Блоги LEPEL.BY

Блукач ВАЛАЦУЖНЫ: 07.12.2011 (08:00) — 7 лет назад

РЫБАНЕЦ НА ПАЛІГОНЕ

Тема: Прырода Лепельскага краю    Сегодня: 1, за неделю: 2, всего: 575

Пра возера рыбанец мала хто ведаў у ранейшыя часіны. Прычына таму -- знаходжанне яго на былым вайсковым палігоне, на сярэдзіне шляху паміж ваеннымі гарадкамі Заслонава і Бароўка, куды цывільнаму люду забаранялася заязджаць і заходзіць.

У першы зімовы выхадны рушыў адпачываць на Рыбанец. Найкарацейшы шлях да яго -- з Мінскай шашы ў Старым Лядне звярнуў на Вялікае Жэжліна, за ім -- Малое Жэжліна і Ірынполле, у Экімані заехаў у густы лес, які праз пару кіламетраў прывёў на Палігон (гэтую назву мясцовасць будзе насіць вечна). Па ім роўна сцелецца бойкая пясчаная дарога. Там, дзе не так даўно гойсалі танкі і выбухалі снарады, паспеў вырасці спецыяльна пасаджаны малады соснік. Гэта прыродзе дапамаглі рэкультываваць былы вайсковы аб’ект ахоўнікі лесу з Лепельскага лясніцтва Крупскага ваеннага лясгаса. Добра захаваліся шырокія і глыбокія барозны ад лесапасадачнага плуга.

У кірунку Заслонава злева да дарогі падступае больш сталы сасновы лес. За ім адгадваецца спуск у нізіну, далёка за якой у воблачнай смузе зімовага бясснежнага дня паўстае сіняватая палоска лесу. Інтуіцыя падказвае, што ў нізіне і павінен знаходзіцца Рыбанец. Ды вось і лясная дарога адгаліноўваецца да яго. Упіраецца яна прама ў прагал сярод чароту.

Азёрная катлавіна лопасцевай формы выцягнутая з захаду на ўсход. Вадазбор плошчай 2,11 квадратнага кіламетра спадзіста-хвалісты складзены з пяскоў, 44 працэнты пад лесам.

Рыбанец уваходзіць у басейн Улы. Выцягнуўся ён на 1,27 кіламетра, змяшчае ў сабе 1,23 мільёна кубаметраў вады, плошча воднага люстра -- 0,34 квадратнага кіламетра.

Заглыбленне пясчанага дна паступовае. Далёка ад берага добра праглядваецца белы грунт, нягуста ўсланы гнілымі расліннымі парэшткамі. Найбольшая глыбіня возера -- 11,2 метра, сярэдняя -- 3,6 метра. Празрыстасць вады -- 1,9 метра. Слаба праточнае -- з захаду выцякае ручай у раку Бярозаўку. Зарастае на двухметровай глыбіні. Шырыня палосы надводнай узбярэжнай расліннасці ад пяці да 25 метраў. Яна рэдка дзе падпускае да адкрытай вады. Водзяцца лешч, гусцяра, шчупак, акунь, плотка, карась, лінь.

Найбольшая шырыня Рыбанца 440 метраў. Добра бачна, як на супрацьлеглым беразе парослая лесам града ці дамба цягнецца на некалькі дзясяткаў метраў. Пад спускам з яе -- утульны бераг. Хацелася б перакінуцца туды, аднак першапачаткова такую задачу перад сабой не ставіў.

Берагавая лінія працягласцю 4,58 кіламетра ўтварае два плёсы з глыбінёй сем і 11,2 метра. Берагі нізкія, зліваюцца са схіламі, пясчаныя, задзерванелыя, месцамі пад хмызняком. На поўнач і поўдзень невялікімі ўчасткамі пойма мае шырыню ўсяго да пяці кіламетраў.

З боку галоўнага палігоннага шляху ўздоўж берага цягнецца слаба прытоўчаная дарога. Яна капіруе канфігурацыю воднага ўрэзку. Схілы вышынёй ад двух да 10 метраў спадзістыя, пясчаныя і супясчаныя, параслі дрэва-хмызняковай расліннасцю.

Для прывалу выбіраю іглістую пляцоўку між соснамі побач з паваленай і засохлай хваінай -- гатовыя дровы для вогнішча. Для адпачынку месца зручнае, для рыбалкі -- непрыдатнае. Да возера не падступіцца -- хмызняк і чарот не пускаюць. Набраць вады можна толькі ў прагале пры першапачатковым пад’ездзе з бойкай дарогі.

Час бег, але пакідаць палігон не хацелася -- з-за хмар час ад часу вызірала бляклае сонейка, весела трашчаў агонь, у палатцы было зусім цёпла, быццам улетку.

Сабраў валацужны рыштунак толькі а 17-й гадзіне. Падышоў да матацыкла і абамлеў -- задняе кола было канчаткова здзьмутае. Уключыў халастыя абароты ды збоку сам пайшоў. На хаду падрэгуляваў работу рухавіка пад хуткасць пешахода, каб не бегчы. Пакуль пераадолеў тры кіламетры да Экімані, зусім сцямнела. Пагрукаў у першую асветленую хату. Мужык, не адчыняючы дзверы, сказаў, што ў вёсцы жывуць адны дачнікі, іх цяпер няма, і помпу знайду хіба што ў Ірынполлі. Там вясковец зусім збіў настрой паведамленнем, што яна іожа быць толькі ў Малым Жэжліне ў Лёнькі-трактарыста. Хату яго па наводцы Ірынпольца адшукаў лёгка. Быў гэта пенсіянер Леанід Яршоў. Ён не толькі даў помпу, але і дапамог выраўняць штуцэр у зрушанай камеры…









Авторизуйтесь, чтобы оставить комментарий
либо используйте:

Темы автора


  




Популярные за неделю


693. МОЙ ДОМ МЕНЯ КОРМИТ. Маркович Леонид — 3 дня назад,   за неделю: 384 
РЭТРА БЛУКАННІ ВА ЎЛАСНЫХ АКВАРЭЛЯХ — 6 дней назад,   за неделю: 321 
ЮНЫЕ КУРЦЫ НЕ НАШЕГО ВРЕМЕНИ. Шуш Эсенскі — 2 дня назад,   за неделю: 245 
691. МАСЛОБОЙНЯ. Шкиндер Василь — 1 неделю назад,   за неделю: 148 
ЯК ЯК ЯК — 7 дней назад,   за неделю: 141 



 

Copyright © 2009 - 2019 — Леонид Огурцов

LEPEL.BY - Карта Лепеля

Пользовательское соглашение